راه واحد الظاهرة اللي ولات كتحز فالقلب بدات كتكتر فالعرائش، وهي كيفاش بعض الأسر كتشجع ولادها القاصرين على الحريك بأي طريقة، المهم يوصلوا لأوروبا ، وسبتة بالخصوص، حتى لو كان هاذ الشي كيتطلب يقطعوا البحر سباحة . كيسلموا راسهم للحرس المدني الإسباني باش يدخلوهم لمراكز القاصرين.
ولكن واش هاد الناس ما كيشوفوش الخطر؟ واش معقول يغامروا بحياة وليداتهم بهاد الطريقة اللي ما فيها رحمة ؟ راه البحر ما كيرحمش، واليوم كنسمعوا على حي القشلة والنباص كامل كيهدرو على دراري حركوا، اللي منهم اللي وصلو، ولكن حتى منهم اللي مفقود وما عارفين عليهم حتى خبر.
هاذ الشي كيهرس القلب، حيث واش الوالدين اللي المفروض يحافظوا على وليداتهم هما ولاو كيساهموا فهاد المأساة؟ راه ولادنا أمانة ، ماشي نرميهم للبحر ونتسناو الحظ ينقذهم . الله يهدي الجميع، هاذ الوضع ماشي عادي وخص المسؤلين يوقفوا عليه . لله الأمر من قبل ومن بعد . ولا حول ولا قوة إلا بالله .🤔
