واش كاين شي نفاق وكاين شي استعراض خاو بحال داك اللي كيديروه بعض الناس فرمضان؟! كيشبعو الطواجن والحريرة والسفوف والبسطيلة ودايرين جلسة عامرة، ومن بعد كيصوروا المائدة وكيحطّوها فالفيس والإنستغرام باش يورّيو للناس “شوفو شحال عندنا”..
فين هو الإحساس؟ فين هو التضامن؟ فين هو المعنى الحقيقي ديال رمضان؟! هاد الشهر ماشي ديال التفاخر والتباهي، راه ديال التقوى، الرحمة، الإحساس بالمحتاجين، ولكن للأسف، كاين اللي نسى هادشي وولا رمضان عندو مناسبة للاستعراض قدام عباد الله.
راك ماعارفش شحال من واحد فهاد اللحظة كيشوف فداك التصاور وعينو تدمع، كاين اللي معندو حتى ريال باش يشري طرف خبز، وكاين اللي كايشوف فداك الطاجين وعينيه عامرين بالدموع حيث ولادو صايمين بلا فطور كيف الناس.
اللي عندو الخير مرحبا، لكن علاش التباهي؟ علاش تحط شي حاجة وانت عارف أنها غادي تحرق قلوب ناس ماعندهاش؟!
رمضان راه تضامن، ستر، وخير بينك وبين الله، ماشي مهرجان ديال “شوفوني شنو عندي”. وخا تكون عندك الدنيا وما فيها، كول بصمت، تصدق بلا ما تبين، وخلي عندك شوية من الحياء!
الخير اللي كيتصور راه ماشي خير، والنية اللي خاصها شهود راه ماشي نية!!!
